Ня так то і проста было пачуць песьню „Халодны блюз” у жывым выкананьні Лявона Вольскага і гурту „Н.Р.М.” цягам апошняга дзесяцігодзьдзя.

Здарылася гэта 25 кастрычніка ў час фінальных канцэнтаў XVI Фэстывалю беларускай бардаўскай ды аўтарскай песьні „Бардаўская восень 2009” у Беластоку. Лявон Вольскі і сам прызнаў, што апошнімі гадамі гурт выконваў гэтую песьню нячаста — яна належала да рэпэртуару „Н.Р.М.” у 90-х гадах мінулага стагодзьдзя.

У мяне самога вялікі сантымэнт да гэтага кавалку „Н.Р.М.” — увесь час жывое ўва мне прыемнае зьдзіўленьне, якое я дасьведчыў у той момант, калі ўпершыню выслухаў альбом „Акустучныя канцэрты канца XX ст.”. Альбом гэты ў чарговы раз пацьвердзіў вялікую клясу „Н.Р.М.” ды паставіў шмат якія добра вядомыя кампазыцыі гурту ў новы ды сьвежы кантэкст. А калі „Н.Р.М.” сыграў на акустычную манеру ўлісаўскае „Радыё Свабода”, дык у той момант, памятаю, я сабе падумаў, што гэтая песьня спакойна магла б быць напісаная і „Н.Р.М.”. (На днях прачытаў, што 15-годзьдзе свайго існаваньня „Н.Р.М.” зьбіраецца адсьвяткаваць менавіта акустычным канцэртам.)

Пераможцы „Бардаўскай восені 2009”
[1] Міхал Бараноўскі	[2] Гурт „Рэлікт”	[3] Андрэй Тамкевіч, Кацярына Ваданосава
Фота Аляксандра Максімюка

Песьня ж „Халодны блюз” павінна была, па-мойму, прагучаць на „Бардаўскай восені” ўжо даўно. Ёсьць у ёй нейкая такая невыказная чароўнасьць, якая прыродна ўпісваецца ў гэты фэстываль: ёсьць там рэфлексіўнасьць, настальгія, памяркоўнасьць, словам — усе колеры восені, якая ў песьні наўпрост згадваецца па сваім імені. Не было б вялікай крыўды ў тым, каб гэтая песьня хоць раз гучала ў час кожнага выпуску „Бардаўскай восені” як лейт-матыў гэтага фэстывалю.